ប្រវត្តិលោក Ivy Ledbetter Lee: បិតានៃទំនាក់ទំនងសាធារណៈសម័យទំនើប

ប្រវត្តិលោក Ivy Ledbetter Lee: បិតានៃទំនាក់ទំនងសាធារណៈសម័យទំនើប លោក Ivy Ledbetter Lee (១៨៧៧–១៩៣៤) ត្រូវបានគេទទួលស្គាល់យ៉ាងទូលំទូលាយថាជា បិតានៃការិយាល័យទំនាក់ទំនងសាធារណៈ (Public Relations) សម័យទំនើប។ លោកបានបដិវត្តន៍វិធីសាស្រ្តដែលក្រុមហ៊ុន និងអង្គការនានាទំនាក់ទំនងជាមួយសាធារណជន ដោយផ្តោតលើគោលការណ៍ដ៏សំខាន់គឺ ភាពស្មោះត្រង់និងតម្លាភាព ជំនួសឱ្យការលាក់បាំងព័ត៌មាន។ ដើមកំណើត ការសិក្សា និងអាជីពដំបូង លោក Ivy Lee កើតនៅថ្ងៃទី ១៦ ខែកក្កដា ឆ្នាំ ១៨៧៧ នៅទីក្រុង Cedartown រដ្ឋ Georgia សហរដ្ឋអាមេរិក។ ឪពុករបស់លោកគឺលោក James Wideman Lee ជាអ្នកបួសក្នុងសាសនា Methodist ដែលមានឥទ្ធិពលយ៉ាងខ្លាំងលើគំនិតរបស់លោក។ បន្ទាប់ពីបញ្ចប់ការសិក្សានៅសាកលវិទ្យាល័យ Princeton លោកបានចាប់ផ្តើមអាជីពជាអ្នកកាសែត។ គាត់បានធ្វើការឱ្យកាសែតល្បីៗជាច្រើនដូចជា The New York American, The New York Times និង The New York World ដែលបានផ្តល់បទពិសោធន៍យ៉ាងជ្រាលជ្រៅអំពីការងារសារព័ត៌មាន និងតម្រូវការរបស់សាធារណជនចំពោះព័ត៌មាន។ ការបង្កើតគោលការណ៍ PR ថ្មី នៅពេលនោះ ក្រុមហ៊ុនធំៗជាច្រើនតែងតែព្យាយាមលាក់បាំងព័ត៌មានអវិជ្ជមានពីសាធារណជន ឬផ្សព្វផ្សាយព័ត៌មានក្លែងក្លាយ។ លោក Lee បានដឹងថាវិធីសាស្រ្តនេះមិនអាចប្រើប្រាស់បានយូរអង្វែងឡើយ ព្រោះវានឹងធ្វើឱ្យបាត់បង់ការទុកចិត្តពីសាធារណជនកាន់តែខ្លាំង។ ដូច្នេះ នៅឆ្នាំ ១៩០៥ លោកបានចាប់ផ្តើមបង្កើតក្រុមហ៊ុនទំនាក់ទំនងសាធារណៈដំបូងគេមួយជាមួយលោក George Parker ដែលមានឈ្មោះថា Parker and Lee។ នៅឆ្នាំ ១៩០៦ លោក Lee បានបោះពុម្ព "សេចក្តីថ្លែងការណ៍នៃគោលការណ៍" (Declaration of Principles) របស់ខ្លួនដែលជាបដិវត្តន៍សម្រាប់វិជ្ជាជីវៈនេះ។ លោកបានប្រកាសយ៉ាងច្បាស់លាស់ថា៖ “នេះមិនមែនជាការិយាល័យសារព័ត៌មានសម្ងាត់ទេ។ កិច្ចការរបស់យើងគឺផ្តល់ព័ត៌មានដល់អ្នកដែលចាប់អារម្មណ៍។ យើងនឹងមិនបញ្ជូនអ្វីដែលមិនត្រឹមត្រូវឡើយ។” គោលការណ៍នេះបានក្លាយជាមូលដ្ឋានគ្រឹះនៃវិជ្ជាជីវៈទំនាក់ទំនងសាធារណៈសម័យទំនើប ដោយផ្តោតលើតម្លាភាព ភាពត្រឹមត្រូវ និងការបើកចំហរ។ ករណីសិក្សាដ៏ល្បីល្បាញ ឧបទ្ទវហេតុផ្លូវដែក Pennsylvania Railroad (១៩០៦)៖ បន្ទាប់ពីមានរថភ្លើងធ្លាក់នៅទីក្រុង Atlantic City ក្រុមហ៊ុនផ្លូវដែកបានជួលលោក Lee ។ ជំនួសឱ្យការលាក់បាំង ដូចដែលធ្លាប់អនុវត្តកន្លងមក លោក Lee បានអញ្ជើញអ្នកកាសែតទៅកាន់កន្លែងកើតហេតុផ្ទាល់ ផ្តល់ព័ត៌មានលម្អិតទាំងអស់ និងអនុញ្ញាតឱ្យពួកគេថតរូប។ នេះជាករណីដំបូងគេដែលត្រូវបានគេចាត់ទុកថាជាការប្រើប្រាស់ សេចក្តីប្រកាសព័ត៌មាន (Press Release) ដ៏មានប្រសិទ្ធភាព។ គ្រួសារ Rockefeller និងការសម្លាប់រង្គាល Ludlow (១៩១៤)៖ ក្នុងអំឡុងពេលធ្វើកូដកម្មរបស់កម្មកររ៉ែនៅរដ្ឋ Colorado បានបណ្តាលឱ្យមានអំពើហិង្សានិងការស្លាប់ ដែលធ្វើឱ្យកេរ្តិ៍ឈ្មោះរបស់មហាសេដ្ឋី John D. Rockefeller ធ្លាក់ចុះយ៉ាងខ្លាំង។ លោក Lee បានក្លាយជាទីប្រឹក្សារបស់ Rockefeller ហើយបានណែនាំឱ្យគាត់ផ្លាស់ប្តូរទស្សនៈ។ តាមការណែនាំរបស់លោក Lee, Rockefeller បានធ្វើដំណើរទៅកាន់រដ្ឋ Colorado ដោយផ្ទាល់ ជួបនិយាយជាមួយកម្មករនិងគ្រួសាររបស់ពួកគេ ទៅទស្សនកិច្ចកន្លែងការងារ និងបានបង្ហាញពីការយកចិត្តទុកដាក់របស់គាត់ជាសាធារណៈ។ យុទ្ធសាស្ត្រនេះបានជួយស្តាររូបភាពរបស់គ្រួសារ Rockefeller ឱ្យប្រសើរឡើងវិញ។ វិធីសាស្រ្ត Ivy Lee Method បន្ថែមពីលើវិស័យទំនាក់ទំនងសាធារណៈ លោក Ivy Lee ក៏ត្រូវបានគេស្គាល់តាមរយៈ វិធីសាស្រ្ត Ivy Lee Method ដែលជាបច្ចេកទេសគ្រប់គ្រងពេលវេលាដ៏សាមញ្ញ តែមានប្រសិទ្ធភាពខ្ពស់។ គាត់បានណែនាំវិធីសាស្ត្រនេះដល់លោក Charles M. Schwab ប្រធានក្រុមហ៊ុន Bethlehem Steel ក្នុងឆ្នាំ ១៩១៨។ វិធីសាស្រ្តនេះមាន ៥ ជំហាន៖ នៅចុងថ្ងៃធ្វើការ ចូរសរសេរកិច្ចការសំខាន់បំផុត ៦ ដែលអ្នកត្រូវធ្វើនៅថ្ងៃស្អែក។ កុំដាក់ច្រើនជាងនេះ។ រៀបចំកិច្ចការទាំង ៦ នោះតាមលំដាប់លំដោយនៃសារៈសំខាន់។ នៅពេលចាប់ផ្តើមថ្ងៃថ្មី ចូរផ្តោតលើកិច្ចការ ទីមួយ តែមួយគត់ រហូតដល់ចប់។ បន្ទាប់ពីបញ្ចប់កិច្ចការទីមួយ ចាំបន្តទៅកិច្ចការទីពីរ ហើយបន្តធ្វើដូចនេះរហូតដល់ចប់បញ្ជី។ រាល់កិច្ចការដែលមិនទាន់ចប់ ចូរយកវាទៅដាក់បញ្ចូលក្នុងបញ្ជីថ្មីសម្រាប់ថ្ងៃបន្ទាប់។ លោក Ivy Lee បានទទួលមរណភាពនៅឆ្នាំ ១៩៣៤ ក្នុងជន្មាយុ ៥៧ ឆ្នាំ។ គោលការណ៍ និងយុទ្ធសាស្ត្ររបស់គាត់បានបន្សល់ទុកនូវកេរដំណែលដ៏សំខាន់មួយ ដែលបានក្លាយជាមូលដ្ឋានគ្រឹះនៃវិជ្ជាជីវៈទំនាក់ទំនងសាធារណៈរហូតមកដល់បច្ចុប្បន្ន។